"బేట్రాయి సామి దేవుడా" పల్లవి:- బేట్రాయి సామి దేవుడా--నన్నేలినోడ బేట్రాయి సామి దేవుడా కాటేమిరాయుడా--కదిరి నరసిమ్ముడా మేటైన వేటుగాడ నిన్నే నమ్మితిరా (బేట్రాయి) శాప కడుపు సేరి పుట్టగా--రాకాసిగాని కోపామునేసి కొట్టగా ఓపినన్ని నీల్లలోన వలసీ వేగామె తిరిగి

"బేట్రాయి సామి దేవుడా"

                    

పల్లవి:-

బేట్రాయి సామి దేవుడా--నన్నేలినోడ

బేట్రాయి సామి దేవుడా

కాటేమిరాయుడా--కదిరి నరసిమ్ముడా

మేటైన వేటుగాడ నిన్నే నమ్మితిరా

                               (బేట్రాయి)

శాప కడుపు సేరి పుట్టగా--రాకాసిగాని

కోపామునేసి కొట్టగా

ఓపినన్ని నీల్లలోన వలసీ వేగామె తిరిగి

బాపనోల్ల సదువులెల్ల బమ్మదేవరకిచ్చినోడ

                                 (బేట్రాయి)

తాబేలై తాను పుట్టగా --ఆ నీల్లకాడ

దేవాసురులెల్ల కూడగా

దోవసూసి కొండ కింద దూరగానే సిల్కినపుడు

సావులేని మందులెల్ల దేవర్ల కిచ్చినోడ

                                 (బేట్రాయి)

అందగాడనవుదు లేవయా--గోపాలగో

విందా రచ్చించా బేగ రావయా

పందిలోన సేరి  కోరపంటితోనె ఎత్తి భూమి

కిందు మిందు సేసినోడ సందమామ నీవెకాద

                                  (బేట్రాయి)

నారసిమ్మ నిన్నే నమ్మితి--నానాటికైన

కోరితి నీ పాదమే గతీ

ఓరి నీవు కంబాన సేరి  ప్రహ్లాదుగాచి

కోరమీస వైరిగాని గుండె దొర్లసేసి నోడ

                                  (బేట్రాయి)

బుడుత బాపనయ్యవైతివి--ఆ శక్కురవరితి

నడిగి భూమి నేలుకుంటివీ

నిడువు కాళ్ళోడివై అడుగునెత్తి పైనబెట్టి

తడవులేక లోకమెల్ల మెడిమతోటి తొక్కినోడ

                                    (బేట్రాయి)

రెండు పదులు ఒక్కమారుతో --ఆ దొరలనెల్ల

సెండాడినావు పరశుతో

సెండ కోల బట్టి కోదండరామ సామికాడ

బెండు కోలసేసి కానీ కొండకాడ కేగినోడ

                                     (బేట్రాయి)

రామదేవ రచ్చించ రావయా--సీతమ్మ తల్లి

శ్యామసుందర నిన్ను మెచ్చగా

సామి తండ్రిమాట గాచి ప్రేమభక్తి నాదరించి

ఆమైన లంకనెల్ల దోమగాను ‌సేసినోడ

                                        (బేట్రాయి)

దేవకీదేవి కొడుకుగా--ఈ జగములోన

దేవుడై నిలిచినావురా

ఆవూలమేపుకోనీ ఆడోళ్ళా కూడుకొనీ

తావు బాగా సేసుకొనీ తక్కిడి బిక్కిడి సేసినోడ

                                       (బేట్రాయి)

ఏదాలు నమ్మరాదని ఆ శాస్త్రాలా

వాదాలు బాగ లేవనీ  

బోధనలూ సేసుకొనీ బుద్ధూలు  సెప్పుకొనీ  

నాదా వినోదుడైన నల్లనయ్య నీవెకాద   

                                    (బేట్రాయి)

కలికి నాదొరవు నీవెగా--ఈ జగములోన

పలికినావు బాల శిశువుడా

చిల్లకట్టు పురములోన బిన్నీ గోపాలుడౌర

పిల్లంగోవి సేతబట్టి పేటపేట తిరిగి నోడ----

                                   (బేట్రాయి)

ఈ పాట యాభై సంవత్సరాల క్రితం గుళ్ళల్లో

పాడుకునే భజన గీతాల్లో ఒకటి.విష్ణుమూర్తి

దశావతారాలమీద ఈ పాట ఉంది. ఈ 

 పాటను 'అత్తారింటికి దారేది'సినిమాలో

పల్లవి,ఒక చరణం పెట్టారు. పూర్తి పాట ఇది.

సేకరణ:-ద్రోణంరాజు శ్రీనివాసరావు ఎస్:ఏ.తెలుగు

               మునిపల్లి.